Listasavn Føroya liggur í Tórshavn og er høvuðslistasavn fyri føroyska list.

Síðani 1930 hevur føroysk list gjørt vart við seg í Norðurlendskum høpi.

Á Listasavni Føroya er høvi at uppliva høvuðslistaverk hjá listafólkum sum Sámal Joensen-Mikines, Ruth Smith, Ingálvur av Reyni, Elinborg Lützen, Thomas Arge, Tróndur Patursson og Anker Mortensen umframt nógv onnur áhugaverd listafólk.

Einføld byggilist við íblástri úr gomlum føroyskum byggisiði setur dám á Listasavn Føroya. Bygningurin minnir um neyst við sínum mongu skjøldrum.

Ljósu framsýningarrúmini lata listina røða. Støddin á savninum gevur rúm fyri bæði hugdýping og yvirliti.

Listasavn Føroya liggur í sera vøkrum umhvørvi, í størstu viðarlundini í Føroyum.